|
(قابل حصاوي أحد معارفه من علماء الاثار وانتهز الفرصة ليتحدث معه في موضوع يشغل باله)
حصاوي: كل شوية اقرا خبر ان الاثار بتاعتنا بتتسرق. ايه الحكاية؟
العالم: ياسيدي.. ما العمر كله بيتسرق
حصاوي: ايه السلبية واليأس اللي انت فيه ده؟ لو اهتمينا شوية بالموضوع ممكن نوصل للعصابات اللي بتسرقها
العالم: طب ماهم معروفين بالاسم
حصاوي: انت شخصيا تعرفهم؟
العالم: طبعا
حصاوي: يبقي لازم تبلغ عنهم
العالم: ما اقدرش. ربنا يجعل كلامنا خفيف عليهم
حصاوي: طب قولي انا يبقوا مين هما؟
العالم: انت بتهرج؟
العالم: ابدا. اللي يقدر يسرق آثار ويقدر يهربها دا اكيد يبقي جن مصور. ومشكلة العفاريت ان تسمع عنهم ولاتشوفهمش
حصاوي: اذا كانوا لهم وجود فعلا يبقي نقدر نشوفهم
العالم: تشوفهم بس لما يطلعوا لك بالليل. ودا مش كويس علشانك لانك مش قدهم.
حصاوي: بس الشرطة لسة قابضة علي ناس كانوا هيبيعوا تمثال لرمسيس الثاني بالحجم الطبيعي وبأربعة مليون جنيه بس
العالم: تجارة الاثار زي تجارة المخدرات اللي بيتقبض عليهم في العادة هما الصبيان الصغيرين
حصاوي: يعني الموضوع ده مالوش حل؟
العالم: مالوش غير حل واحد
حصاوي: ايه هو؟
العالم: الاثار أغلي من الدهب. بس مشكلاتها انها بعد ما تتسرق وتتهرب لبرة مصر اللي بيشتريها مايقدرش يخفيها زي ما يخفي الدهب أو الفلوس وعشان كدة الحل اننا نستردها
حصاوي: وزارة الثقافة ساعات فعلا تسترد بعض الاثار اللي اتهربت لأوروبا بس مش معقول كل العالم يرجع لنا أثارنا من غير ماندفع لهم ثمن
حصاوي: بس الاثار دي لاتقدر بتمن, نجيب لها فلوس منين؟
العالم: افهم ياحصاوي. احنا ممكن نسترد اثارنا من غير ما ناخدها ونرجعها عندنا
حصاوي: ازاي بقي؟
العالم: الاثر ممكن يكون قطعة حجر. صحيح كونه قديم بيخلي له قيمة تاريخية وبالتالي قيمة مادية لكن دي القيمة الأقل. انما قيمته الحقيقية انه رمز
حصاوي: رمز؟
العالم: ايوه. رمز لمعني أو مبدأ أو فكرة أو علم. واثارنا الفرعونية رموز للحق والعدل والخير والاستقامة والضمير. وانت لما تبيع الاثر أو تفرط فيه حتي ولو بالاهمال يبقي بعت المعني والحقيقة اللي وراه. والعالم من قرون بيسرقوا رموزنا, خدوا افكارنا وخدوا علمنا وخدوا كل الروحانيات مننا وكتبوا كل الحاجات دي باسمهم.
حصاوي: بس بيقولوا علي الحضارة المصرية القديمة انها علي العكس قامت علي الاستعباد والعبودية والسخرة.
العالم: اللي قال الكلام ده هما الهمج اللي استعمروا مصر واسقطوا حضارتها بالقوة.
الانسان ممكن تسخره يقطع حجر في الجبال أو يشق قناة. لكن ماتقدرش تسخره أو تأمره يخترع ويبتكر ويكتشف في كل مجالات الحياة من الطب للكيمياء للفلك للنحت والرسم والأدب والموسيقي والكتابة نفسها. مكانش حد غلب.
حصاوي: برضه لسة مافهمتش نسترد اثارنا ازاي من غير ماناخدها من اللي سرقوها ونرجعها عندنا في مصر؟
العالم: بأننا ندفع التمن زي ما قولنا. بس ده غالي قوي. والظاهر مانقدرش عليه.
حصاوي: والتمن ده ايه بالتحديد؟
العالم: نبذل جهد عشان نفهم الرموز اللي وراها, ونفك شفرتها اللي بتدعو للحق والعدل والاستقامة والضمير, وحتي لو كنا احنا مش أحفادهم بالضبط نعمل اننا أحفادهم.
حصاوي( يحملق فيه بدهشة): انا مش فاهم. انت زي ماتكون بتتكلم هيروغليفي أو بترطن بلغة أجنبية وبتقول افكار الخواجات.
العالم: الهيروغليفي لغة أجنبية؟ وافكار قدماء المصريين عن الحق والعدل والاستقامة والضمير هو كلام الخواجات؟ دا مش عمرنا كله اتسرق وبس دا تاريخنا كله اتسرق وانت بتتكلم عن سرقة الاثار؟ انت من أحفاد الهمج اللي استعبدونا ياحصاوي؟
(حصاوي يغشي عليه في الحال)
|
