الجمعة 19 من رمضان 1440 هــ 24 مايو 2019 السنة 143 العدد 48381

رئيس مجلس الادارة

عبدالمحسن سلامة

رئيس التحرير

علاء ثابت

رئيس التحرير

علاء ثابت

«جايز تِحْزَن»

رشا الفوال

من حارة لـ حارة / وبإلحاح

بتحاول تبكى عشان ترتاح

ماانتاش عارف

متوسط زمن الرحلة ساعات / فبلاش تندم

سنوات السعى وما أمكن

رسمت إحساسك باللذات

من غير جُملة « جايز تِحزَن»

من غير جايز

أصبحت حزين

روحك معروضة فى الفتارين

وتَمنها رخيص

والشارى خسيس جدًا جدًا

قلبك على جنب هناااك/ مفروش

نفَسَك مكروش

وماعادش بيقدر ع الدخان

لونك باهت

والعدسة اللى فـ عينك شاخت

مابقيتش بتستحمل كشاف

بتخاف من ضِلك ع الحيطة

ماانتاش طايق حبة زيطة

شوطة توديك / شوطة تجيبك

لعنة إحساسك بالغثيان حالفة تصيبك

والدمعة اللى انت بتكتمها

عمالة تفلفص م القهرة

وتفك الشفرة بكل هدوء

مزقوق كبتك يرسم تجاعيد

من خط لـ خط فـ كف إيديك

دورك فى القصة يادوب / سنيد

دمك مرصود

والناس بتحبك بشروطها

جبروتها فـ لحظة بيجلبلك / أوجاع أكتر

ولسان أبتر

ودراع مرعوش

كلُه على فاشوش/ اوعيَّ تصَدَق

حاول تبكى يمكن ترتاح

سفاح الخوف اللى محاوطك

حابس أنفاسك بالقوة

والسكة لآخر السكة براااااح

مافيهاش هوه

من أرض لأرض الدود واحد

مستنى الفرصة عشان يبدأ

دمك مرصود

والخوف سفاح

حاول تبكى / يمكن ترتاح

رابط دائم: 
 
 
 
 
 
اضف تعليقك
البريد الالكترونى
 
الاسم
 
عنوان التعليق
 
التعليق